បំណែកយានអវកាសរស្ស៊ី​នឹង​ធ្លាក់ក្នុង​ទឹក​ដី​កម្ពុជា​​ចាប់​ពី​យប់​ថ្ងៃទី​១៤ ដល់​ថ្ងៃទី​១៦ ខែ​មករា

ភ្នំពេញៈ មន្រ្តី​ការពារ​ជាតិ​កម្ពុជា​បាន​និយាយ​ឲ្យ​ដឹង​នៅ​រសៀល​ថ្ងៃទី​១៤ ខែ​មករា នេះ ថា បំណែក​យាន​អាវកាស​របស់​ប្រទេស​រុស្ស៊ី ​អាច​នឹង​ធ្លាក់​នៅ​តំបន់​ណា​មួយ​ក្នុង​ប្រទេស​កម្ពុជា។

 យោង​តាម​ប្រភព​ព័ត៌មាន​ដដែល​បាន​ឲ្យ​ដឹង​ទៀត​ថា ​យោង​តាម​សេចក្ដី​ជូន​ដំណឹង​របស់​ស្ថាន​ទូត​រុស្ស៊ី​ប្រចាំ​កម្ពុជា​បាន​​ បញ្ជាក់​ថា ​ចាប់ពី​ម៉ោង ៧​យប់​ថ្ងៃទី១៤ ខែ​មករា ដល់​ថ្ងៃ​ទី​១៦ ខែ​មករា នេះ បំណែក​យាន​អាវកាស​របស់​រុស្ស៊ី អាច​ធ្លាក់​នៅ​តំបន់​ណា​មួយ​ក្នុង​ប្រទេស​កម្ពុជា។ ប៉ុន្តែ​បំណែក​នោះ​មិន​ប៉ះ​ពាល់​អ្វី​ធ្ងន់​ធ្ងរ​​នោះ​ទេ។
 សេចក្តីជូន​ព័ត៌មាន​របស់​ក្រសួងម​ហា​ផ្ទៃ​កម្ពុជា​ ដែលចេញផ្សាយនៅយប់ថ្ងៃទី១៤ ខែមករា នេះ បានឲ្យដឹងថា «យោងតាមព័ត៌មាន ផ្តល់ដោយស្ថានទូត សហព័ន្ធរុស្ស៊ី ប្រចាំនៅកម្ពុជា បំណែកមួយចំនួន នៃយានអាវកាស ដែលខូចនឹងធ្លាក់ចុះមកភពផែនដី នៅចន្លោះពេលពីថ្ងៃទី១៤ ខែមករា ឆ្នាំ២០១២ វេលាម៉ោង ៧ និង០០នាទីយប់ ដល់ថ្ងៃទី១៦ ខែមករា ឆ្នាំ២០១២»។

សេចក្តីជូនព័ត៌មាននេះ បានបញ្ជាក់ទៀតថា «បំណែកយានអាវកាសទាំងនេះ នឹងធ្លាក់លើរង្វង់តំបន់មួយ នៃផែនដី ដែលក្នុងនោះ រួមមានប្រទេសកម្ពុជាផងដែរ»។
តែទោះជាយ៉ាងណា សេចក្តីប្រកាសព័ត៌មានខាងលើនេះ បានឲ្យដឹងទៀតថា លទ្ធភាពដែលបំណែកយានអាវកាស ធ្លាក់មកលើទឹកដីកម្ពុជា មានតិចតួចទេ ហើយការជូនព័ត៌មាននេះ ដើម្បីឲ្យសាធារណជន មានការប្រុងប្រយ័ត្នខ្ពស់នៅគ្រប់ទីកន្លែង នៃប្រទេសកម្ពុជា ចៀសវាងការភ្ញាក់ផ្អើល៕
ដកស្រង់ពីកម្ពុជាថ្មី